Ikipe ya Paris Saint-Germain (PSG) yongeye kwandika amateka yegukana igikombe cya UEFA Champions League cya 2025/26 nyuma yo gutsinda Arsenal kuri penaliti 4-3, nyuma y'uko iminota 120 y'umukino yari yarangiye amakipe yombi anganya igitego 1-1. Uyu mukino wa nyuma wabereye kuri Puskás Aréna mu mujyi wa Budapest ku wa 30 Gicurasi 2026, witabiriwe n'abafana barenga ibihumbi 61 bari baje kwihera ijisho imwe mu mikino ikomeye ku mugabane w'u Burayi. Arsenal yatangiye umukino iri ku rwego rwo hejuru, ifungura amazamu hakiri kare ku munota wa gatandatu ibifashijwemo na Kai Havertz, watsinze igiteg

Ikipe ya Paris Saint-Germain (PSG) yongeye kwandika amateka yegukana igikombe cya UEFA Champions League cya 2025/26 nyuma yo gutsinda Arsenal kuri penaliti 4-3, nyuma y'uko iminota 120 y'umukino yari yarangiye amakipe yombi anganya igitego 1-1. Uyu mukino wa nyuma wabereye kuri Puskás Aréna mu mujyi wa Budapest ku wa 30 Gicurasi 2026, witabiriwe n'abafana barenga ibihumbi 61 bari baje kwihera ijisho imwe mu mikino ikomeye ku mugabane w'u Burayi. Arsenal yatangiye umukino iri ku rwego rwo hejuru, ifungura amazamu hakiri kare ku munota wa gatandatu ibifashijwemo na Kai Havertz, watsinze igitego cyiza nyuma yo guhabwa umupira na Leandro Trossard. Nyuma yo gutsindwa hakiri kare, PSG yatangiye kugenzura umukino no gukinira cyane mu kibuga cya Arsenal. Nubwo yakomeje gusatira ishaka kwishyura, yahuye n'ubwugarizi bukomeye bwari buyobowe na Gabriel Magalhães na William Saliba, bakomeje gukoma mu nkokora ba rutahizamu bayo. Mu gice cya kabiri, ku munota wa 65, Ousmane Dembélé yishyuriye PSG kuri penaliti nyuma y'uko Cristhian Mosquera akoze ikosa kuri Khvicha Kvaratskhelia mu rubuga rw'amahina. PSG yakomeje gusatira ishaka igitego cy'intsinzi, aho Kvaratskhelia yateye umupira ukubita igiti cy'izamu, mu gihe Vitinha na we yakomeje kugerageza uburyo butandukanye bwo kubona izamu, ariko Arsenal ikomeza kwihagararaho. Iminota 90 isanzwe n'iminota 30 y'inyongera yarangiye amakipe yombi anganya igitego 1-1, bituma hiyambazwa penaliti kugira ngo haboneke wegukana igikombe. Mu gutera penaliti, PSG yitwaye neza kurusha Arsenal, itsinda penaliti enye muri eshanu, mu gihe Arsenal yinjije eshatu gusa. Penaliti ya nyuma ya Gabriel Magalhães yarenze izamu, biha PSG intsinzi ya 4-3 ndetse n'igikombe cya kabiri cya UEFA Champions League yikurikiranya. Umutoza Luis Enrique yongeye gufasha PSG kugera ku ntsinzi ikomeye ku rwego rw'u Burayi, aho iyi kipe ibaye iya kabiri mu mateka ya UEFA Champions League ibashije kurinda igikombe yari yegukanye umwaka wabanje, nyuma ya Real Madrid yabigezeho hagati ya 2016 na 2018. Ku ruhande rwa Arsenal, nubwo itabashije kwegukana igikombe cya mbere cya UEFA Champions League mu mateka yayo, isoje umwaka w'imikino ifite ibyo yishimira nyuma yo kwegukana igikombe cya Premier League, yari imaze imyaka 22 itarabona. Nyuma y'umukino, Ousmane Dembélé yahawe igihembo cy'umukinnyi mwiza w'umukino, nyuma yo kugira uruhare rukomeye mu gufasha PSG kwisubiza igikombe no gukomeza kwicara ku ntebe y'ubwami bw'umupira w'amaguru ku mugabane w'u Burayi. By'umwihariko, uyu mukino wa nyuma wahuje amakipe yombi asanzwe afitanye ubufatanye na gahunda ya Visit Rwanda, ari yo PSG na Arsenal. Ni ibintu byatumye u Rwanda rukomeza kugaragara ku ruhando mpuzamahanga binyuze muri siporo, mu gihe ibirango bya Visit Rwanda bikomeje kwamamarizwa mu marushanwa akomeye y'umupira w'amaguru ku mugabane w'u Burayi

Urushijeho kumenya. Urushijeho kwegera abandi.