Police VC yatangiye neza, EAUR VC itungura REG muri shampiyona ya Volleyball

Police VC yatangiye neza Shampiyona ya Volleyball mu Rwanda ya 2026–2027, itsinda Gisagara VC amaseti 3-2, mu gihe East African University Rwanda (EAUR VC) yatunguye REG VC iyitsinda amaseti 3-2 mu mukino wabaye ku wa Gatandatu, tariki ya 17 Ukwakira 2026. Ku munsi wa mbere wa shampiyona, wabereye muri Petit Stade i Remera ku wa Gatanu, tariki ya 16 Ukwakira 2026, APR VC yatsinze Kirehe VC amaseti 3-0 (25-16, 25-21, 25-20), mu gihe Police WVC yatsinze Kepler WVC na yo amaseti 3-0 (25-7, 25-18, 25-20). Mu mukino wari utegerejwe na benshi, Police VC yatsinze Gisagara VC nyuma yo kuva inyuma itsindwa amaseti abiri ya mbere, igaruka mu mukino itsinda amaseti atatu yakurikiyeho. Gisagara yari yatangiye itsinda amaseti abiri ya mbere ku manota 25-22 na 25-19, ariko Police yishyura iya gatatu ku manota 25-14, itsinda iya kane ku manota 26-24, inegukana iya kamarampaka ku manota 15-12. Ku wa Gatandatu, EAUR VC na yo yakoze ibitari byitezwe, itsinda REG VC amaseti 3-2. REG yatangiye itsinda iseti ya mbere ku manota 25-22, EAUR yishyura iya kabiri ku manota 25-21, REG itsinda iya gatatu ku manota 25-17. EAUR yatsinze iya kane ku manota 25-22, mbere yo kwegukana iya kamarampaka ku manota 15-12. Nyuma y’umukino, umutoza wa EAUR VC, Dusengimana Vincent, yavuze ko imyitozo ikomeye no kwitanga ari byo byabafashije gutsinda. Yagize ati: “Ibanga ni ugukina no gukora imyitozo ikomeye kurushaho. Intsinzi yacu ituruka ku kwitanga byimazeyo mu mukino.” Shampiyona izakomeza hakinwa umunsi wa kabiri uteganyijwe i Kirehe ku wa 25 Ukwakira 2026.