Xi Jinping wa China agiye gusura Kyrgyzstan na Misiri mu gihe amakimbirane yo mu Burasirazuba bwo Hagati akomeje

Perezida w’u Bushinwa, Xi Jinping, ategerejwe mu ruzinduko rwa Leta muri Kyrgyzstan no mu Misiri kuva ku wa 30 Kanama kugeza ku wa 3 Nzeri 2026, mu gihe umutekano n’ubukungu byo mu Burasirazuba bwo Hagati bikomeje guhura n’imbogamizi zikomeye. Nk’uko Minisiteri y’Ububanyi n’Amahanga y’u Bushinwa yabitangaje, Xi azabanza kujya i Bishkek muri Kyrgyzstan, aho azitabira inama y’Umuryango wa Shanghai Cooperation Organisation (SCO). Iyo nama izahuriza hamwe ibihugu bigize uwo muryango, birimo u Burusiya na Iran, kugira ngo biganire ku kongera ubufatanye ndetse n’ibibazo bikomeye by’umutekano n’imiba

Perezida w’u Bushinwa, Xi Jinping, ategerejwe mu ruzinduko rwa Leta muri Kyrgyzstan no mu Misiri kuva ku wa 30 Kanama kugeza ku wa 3 Nzeri 2026, mu gihe umutekano n’ubukungu byo mu Burasirazuba bwo Hagati bikomeje guhura n’imbogamizi zikomeye.

Nk’uko Minisiteri y’Ububanyi n’Amahanga y’u Bushinwa yabitangaje, Xi azabanza kujya i Bishkek muri Kyrgyzstan, aho azitabira inama y’Umuryango wa Shanghai Cooperation Organisation (SCO). Iyo nama izahuriza hamwe ibihugu bigize uwo muryango, birimo u Burusiya na Iran, kugira ngo biganire ku kongera ubufatanye ndetse n’ibibazo bikomeye by’umutekano n’imibanire mpuzamahanga.

Mu ruzinduko rwe muri Kyrgyzstan, Xi kandi azagirana ibiganiro na Perezida Sadyr Japarov, ndetse anitabire ibikorwa bitandukanye bya Leta. Uruzinduko rwe ruje mu gihe SCO ikomeje gushaka kongera uruhare rwayo mu bibazo by’umutekano, ubukungu n’ubufatanye hagati y’ibihugu byo muri Aziya.

Nyuma ya Kyrgyzstan, Xi azakomereza urugendo mu Misiri, aho azahura na Perezida Abdel Fattah el-Sisi. Minisiteri y’Ububanyi n’Amahanga y’u Bushinwa yavuze ko ibiganiro by’abayobozi bombi bizibanda ku gushimangira umubano w’ibihugu byombi no kugira uruhare mu gushaka amahoro n’umutekano mu karere.

Uru ruzinduko ruzaba ari urwa mbere Xi Jinping agiriye muri Misiri mu myaka 10 ishize, ibintu Beijing ivuga ko bifite umwihariko mu guteza imbere umubano hagati y’ibihugu byombi.

Uruzinduko rwa Xi kandi rubaye mu gihe amakimbirane hagati ya Iran na Leta Zunze Ubumwe za Amerika akomeje kugira ingaruka ku Burasirazuba bwo Hagati no ku bukungu bw’isi. Guhagarara cyangwa guhungabana kw’ubwikorezi muri Strait of Hormuz, imwe mu nzira zikomeye z’ubucuruzi bw’ibikomoka kuri peteroli ku isi, byateje impungenge ku isoko ry’ingufu n’ubucuruzi mpuzamahanga.

China ifite inyungu zikomeye mu karere, cyane cyane ku bijyanye n’ingufu. Mbere y’iyi ntambara, ibihugu byo mu Burasirazuba bwo Hagati byari mu masoko akomeye China yavanagamo peteroli nyinshi itumiza hanze.

Abasesenguzi bashobora gukurikiranira hafi uru ruzinduko bitewe n’uko rushobora guha Beijing umwanya wo kuganira ku mutekano w’akarere, ubufatanye mu by’ubukungu ndetse n’uburyo ibibazo biri hagati ya Iran n’ibindi bihugu byakemurwa mu nzira ya dipolomasi.

Uru ruzinduko ruzaba ari urwa kabiri Xi Jinping agiriye hanze y’u Bushinwa muri uyu mwaka wa 2026, nyuma y’uruzinduko yagiriye muri Korea ya Ruguru muri Kamena.