Kuri uyu wa Gatatu, tariki ya 28 Ukwakira 2026, Polisi y’u Rwanda yungutse abapolisi 70 basoje amahugurwa ku nshuro ya 22. Muri bo, 59 ni abagabo, mu gihe 11 ari abagore.

Iyi myiyereko yayobowe n’umwarimu wigisha abapolisi, Akimana Diane, ikaba yari igamije kugaragaza ubumenyi n’ubushobozi abapolisi bagize mu gihe cy’amahugurwa, cyane cyane mu bijyanye no gukoresha intwaro no guhangana n’ibibazo bitandukanye by’umutekano.

Aya mahugurwa yari agizwe n’ibice 14 birimo ubutumwa bwo gutangiza imyiyereko (Opening Message), kurasa mu gihe cy’inzibacyuho (Transition Shooting), kurasa mu rwego rwo gukosora amakosa (Corrective Shooting), uburyo bwo kongera amasasu mu ntwaro (Reloading Techniques), guhindura imyanya (Changing Position) no kurasa vuba uri ahantu hagukingira (Speed Shooting Under Cover).

Ibindi byagaragajwe muri iyi myiyereko birimo kurasa ku ntego mu buryo bwitondewe (Precision Shooting), kurasa vuba ukoresheje intoki (Speed Shooting Using Hand), guhitamo ibara (Choosing Color), gukurikirana no kurasa ku ntego igenda (Moving Target), ndetse n’imyitozo ijyanye n'ibikorwa byo guhangana n’iterabwoba (Anti-terrorism Operations).

Iyi myiyereko yagaragaje zimwe mu ngeri z'ubumenyi abapolisi bahabwa mu mahugurwa agamije kubongerera ubushobozi mu kazi kabo ko kurinda umutekano w'abaturage no guhangana n'ibyaha bitandukanye.

Urushijeho kumenya. Urushijeho kwegera abandi.