Umunyarwandakazi yegukanye umudari WA zahabu kumunsi wambere w'amarushanwa.

Umunyarwandakazi Yvonne Masengesho w'imyaka 18 yegukanye umudari wa zahabu muri Shampiyona Nyafurika yo gusiganwa ku magare ya 2026, iri kubera i Kisumu muri Kenya, nyuma yo kuza ku mwanya wa mbere mu isiganwa ryo gusiganwa n’igihe mu cyiciro cy’abakobwa batarengeje imyaka 19.

Ku wa 21 Ukwakira 2026, Masengesho yakoze intera ya kilometero 10,2 mu minota 15, amasegonda 37 n’ibice 19, atsinda abandi bakinnyi bari bahanganye muri iki cyiciro baturutse mubihugu 17 by'Afurika.

Umunyamisiri Joudy El Sayed yegukanye umwanya wa kabiri, arushwa na Masengesho amasegonda atatu, mu gihe Umunya-Etiyopiya Rahel Gimbato yabaye uwa gatatu, arushwa amasegonda 31.

Iyi ntsinzi yahesheje u Rwanda umudari wa zahabu mu ntangiriro z’iyi Shampiyona Nyafurika, ihuza abakinnyi baturutse mu bihugu bitandukanye bya Afurika.

Shampiyona Nyafurika yo gusiganwa ku magare ya 2026 yatangiye ku wa 21 Ukwakira ikaba iteganyijwe gusozwa ku wa 25 Ukwakira 2026. Abakinnyi bahatanira imidari mu byiciro bitandukanye, birimo abakiri bato, abatarengeje imyaka 23 n’abakuru.