Ukraine yagabye igitero cya Drones i Nizhnekamsk, abantu 13 barapfa

Abantu 13, barimo umwana umwe, bishwe abandi 75 barakomereka mu gitero cya drones cyagabwe na Ukraine mu mujyi wa Nizhnekamsk, mu ntara ya Tatarstan mu Burusiya, nk’uko abayobozi b’aho babitangaje ku wa Mbere. Nizhnekamsk iherereye mu bilometero birenga 1,100 uvuye ku mupaka wa Ukraine , bituma iki gitero kiba kimwe mu byibasiye cyane imbere mu Burusiya kuva Moscow yatangiza intambara yagutse muri Ukraine mu 2022. Muri iki gitero, drones zageze ku bikorwaremezo by’inganda biri muri Nizhnekamsk, ahazwi cyane kubera ibikorwa byo gutunganya peteroli n’inganda zikomeye. Ukraine yemeje ko Tanevo oi

Abantu 13, barimo umwana umwe, bishwe abandi 75 barakomereka mu gitero cya drones cyagabwe na Ukraine mu mujyi wa Nizhnekamsk, mu ntara ya Tatarstan mu Burusiya, nk’uko abayobozi b’aho babitangaje ku wa Mbere.

Nizhnekamsk iherereye mu bilometero birenga 1,100 uvuye ku mupaka wa Ukraine, bituma iki gitero kiba kimwe mu byibasiye cyane imbere mu Burusiya kuva Moscow yatangiza intambara yagutse muri Ukraine mu 2022.

Muri iki gitero, drones zageze ku bikorwaremezo by’inganda biri muri Nizhnekamsk, ahazwi cyane kubera ibikorwa byo gutunganya peteroli n’inganda zikomeye.

Ukraine yemeje ko Tanevo oil refinery yibasiwe. Ikigo cyo muri Ukraine gikora ikoranabuhanga rya gisirikare, FirePoint, na cyo cyavuze ko drones zo mu bwoko bwa FP-1 zakoreshejwe muri icyo gitero.

Ukraine imaze igihe yongera ibitero bya drones ku nganda za peteroli n’ibindi bikorwaremezo by’ingufu biri mu Burusiya, ivuga ko bimwe muri byo bifasha Moscow kubona umutungo no gukomeza ibikorwa by’intambara.

Abayobozi b’Uburusiya bavuze ko igitero cyagize ingaruka no ku baturage basanzwe, aho umwana ari umwe mu bantu 13 bapfuye.

Komite y’Uburusiya ishinzwe iperereza yavuze ko abasivili batari bafite aho bahuriye n’ibikorwa bya gisirikare bari muri ako gace. Icyakora, aya makuru y’impande z’Uburusiya ntabwo yose yagenzuwe ku buryo bwigenga.

Umuyobozi wa Tatarstan, Rustam Minnikhanov, yemeje ko igitero cyabaye anihanganisha imiryango yabuze ababo. Umuyobozi wa Nizhnekamsk, Radmir Belayev, yavuze ko ibyabaye ari igihombo gikomeye ku baturage.

Nyuma y’iki gitero, muri Tatarstan hatangajwe igihe cyo kunamira no kwibuka abahitanywe nacyo.

Uburusiya bwatangaje kandi ko ingabo zabwo zirinda ikirere zarashe cyangwa zisenya drones za Ukraine zirenga 450 mu ijoro ry’igitero.

Ibi byerekana ubukana bw’ibitero bya drones byombi bikomeje kuranga intambara hagati y’Uburusiya na Ukraine, aho Kyiv imaze kongera ubushobozi bwo kugaba ibitero ku ntera ndende.

Nizhnekamsk na Tatarstan si ubwa mbere byibasiwe. Aka karere gafite inganda zikomeye za peteroli n’ibindi bikorwa by’inganda, kandi Ukraine yagiye igaba ibitero kuri ibyo bikorwaremezo mu bihe bitandukanye.

Igitero cya Nizhnekamsk kibaye mu gihe impande zombi zikomeje kwibasira ibikorwaremezo n’imijyi y’undi.

Mu minsi ishize, Uburusiya bwagabye ibitero bikomeye bya drones na missiles muri Ukraine, birimo ibitero byahitanye abaturage i Kyiv na Kharkiv.

Nubwo impande zombi zikunze kuvuga ko ibitero byazo bigamije ibikorwaremezo bifasha umwanzi mu ntambara, abaturage basanzwe bakomeje kuba mu kaga, cyane cyane mu gihe ibitero bigenda bigera kure y’imirongo y’urugamba.

Iki gitero cya Nizhnekamsk kandi cyerekanye ko ubushobozi bwa Ukraine bwo kohereza drones kure mu gihugu cy’Uburusiya bukomeje kuba ikibazo gikomeye ku mutekano w’ibikorwaremezo by’ingufu bya Moscow.