Uburusiya bwagabye igitero ku kiraro cya kabiri gikomeye i Kyiv

Igitero cy’Uburusiya cyibasiye ikiraro cya kabiri gikomeye mu murwa mukuru wa Ukraine, Kyiv, nk’uko umuyobozi w’umujyi, Vitali Klitschko, yabitangaje. Ibi bibaye mu gihe Uburusiya bukomeje kongera ibitero ku bikorwa remezo by’ingenzi muri uyu mujyi. Klitschko yavuze ko igitero cyabaye mu gitondo cyo kuri uyu wa Gatandatu cyangije umuhanda wo ku kiraro cya Northern Bridge ndetse n’insinga z’amashanyarazi zitwara bisi z’amashanyarazi, bituma urujya n’uruza rw’ibinyabiziga ruhagarara. Iki gitero kibaye nyuma y’uko ikindi kiraro gikomeye muri Kyiv, Southern Bridge, cyibasiwe inshuro nyinshi n’in

  Igitero cy’Uburusiya cyibasiye ikiraro cya kabiri gikomeye mu murwa mukuru wa Ukraine, Kyiv, nk’uko umuyobozi w’umujyi, Vitali Klitschko, yabitangaje. Ibi bibaye mu gihe Uburusiya bukomeje kongera ibitero ku bikorwa remezo by’ingenzi muri uyu mujyi. Klitschko yavuze ko igitero cyabaye mu gitondo cyo kuri uyu wa Gatandatu cyangije umuhanda wo ku kiraro cya Northern Bridge ndetse n’insinga z’amashanyarazi zitwara bisi z’amashanyarazi, bituma urujya n’uruza rw’ibinyabiziga ruhagarara. Iki gitero kibaye nyuma y’uko ikindi kiraro gikomeye muri Kyiv, Southern Bridge, cyibasiwe inshuro nyinshi n’indege zitagira abapilote z’Uburusiya ku wa Kane no ku wa Gatanu. Klitschko yari yaburiye ko ibitero nk’ibi “birimo gusenya Kyiv.” Northern Bridge na Southern Bridge bihuza ibice by’iburasirazuba n’iburengerazuba bw’umurwa mukuru. Mbere y’ibitero byo ku wa Kane, ibyo biraro byombi ntibyari byarigeze byibasirwa, ibintu bishobora kugaragaza impinduka nshya mu buryo Moscou iri gukoresha mu bikorwa byayo bya gisirikare. Ibitero kuri Southern Bridge byateje ibibazo bikomeye mu ngendo kuva ku wa Kane, aho ingendo za metro n’iz’imodoka zambukiranya icyo kiraro zahagaritswe. Abaturage benshi bo muri Kyiv, umujyi utuwe n’abantu hafi miliyoni eshatu, bakoresha metro mu gutembera hagati y’ibice bitandukanye by’umujyi. Mu butumwa yanyujije kuri Telegram ku wa Gatandatu, Klitschko yagize ati: “Ikiraro cy’Amajyaruguru cyibasiwe. Abashinzwe ubutabazi bari mu nzira.” Yakomeje agira ati: “Kugeza ubu, urujya n’uruza rw’ibinyabiziga ruvuye ku nkombe y’ibumoso rujya ku nkombe y’iburyo rwahagaritswe.” Ibitero byabanje kuri Southern Bridge byatumye akanama gashinzwe umutekano n’ingabo mu mujyi wa Kyiv gakora inama y’amage ku wa Gatanu. Nyuma y’iyo nama, Klitschko yavuze ko umujyi wari ugeze mu “bihe bikomeye cyane”, kubera ko Moscou yari iri kwibasira “ibikorwa remezo by’ingenzi, uburyo bwo gutwara ibintu, amazu” n’ibindi bikorwa by’ingenzi. Perezida w’Uburusiya, Vladimir Putin, yavuze ko Uburusiya buri gukora ibi bikorwa mu rwego rwo gusubiza ibitero bya Ukraine ku bikorwa remezo by’ingufu byo mu Burusiya. Icyakora, ibitero nk’ibyo ku bikorwa by’ingufu byatangijwe bwa mbere na Moscou. Perezida wa Ukraine, Volodymyr Zelensky, yavuze ko Putin yafashe umwanzuro w’uko mu kugaba ibitero kuri Ukraine “nta mategeko akiriho.” Mu kiganiro yagiranye n’ikinyamakuru Financial Times, Zelensky yagize ati: “Abarusiya bananiwe kudutwara. Ubu rero bari kugaba ibitero bikomeye kandi bakica abantu benshi.” Yongeyeho ati: “Bashaka gusenya ibiraro byacu, ibigo bibikwamo amakuru, internet, imiyoboro y’itumanaho rya telefoni, ibitaro, amashuri y’incuke, amashuri, za kaminuza ibintu byose. Bashaka ko abantu bahunga imijyi yabo.”