Nyuma yuko umuyoboro wa Suez ufunzwe Misiri igiye kubaka umuhanda wa gari ya moshi.

Mu gihe kirenga ikinyejana, umuyoboro wa Suez (Suez Canal) wabaye inzira ikomeye kandi yizewe mu bucuruzi bwa Misiri, unyuramo hafi 12% by’ubucuruzi bwose bukorwa ku isi hakoreshejwe amato. Icyakora, ibibazo by’umutekano biherutse kugaragara mu Nyanja Itukura byagaragaje intege nke z’iyi nzira. Amato menshi yahatiwe guca arazenguruka anyuze hafi ya Cape of Good Hope, ku majyepfo ya Afurika, amafaranga Misiri yinjizaga mu bwikorezi anyuze muri Suez aragabanuka, ndetse n’uruhererekane rw’ibikorwa byo gutwara ibicuruzwa ku isi rurahungabana cyane. Mu rwego rwo kurinda ubukungu bwayo, umurwa mukur

  Mu gihe kirenga ikinyejana, umuyoboro wa Suez (Suez Canal) wabaye inzira ikomeye kandi yizewe mu bucuruzi bwa Misiri, unyuramo hafi 12% by’ubucuruzi bwose bukorwa ku isi hakoreshejwe amato. Icyakora, ibibazo by’umutekano biherutse kugaragara mu Nyanja Itukura byagaragaje intege nke z’iyi nzira. Amato menshi yahatiwe guca arazenguruka anyuze hafi ya Cape of Good Hope, ku majyepfo ya Afurika, amafaranga Misiri yinjizaga mu bwikorezi anyuze muri Suez aragabanuka, ndetse n’uruhererekane rw’ibikorwa byo gutwara ibicuruzwa ku isi rurahungabana cyane. Mu rwego rwo kurinda ubukungu bwayo, umurwa mukuru Cairo watangiye kubaka indi nzira yihuta yo gutwara ibicuruzwa hakoreshejwe gari ya moshi, inyura ku butaka. Minisitiri w’Ubukungu n’Igenamigambi wa Misiri, Ahmed Rostom, yagize ati: “Twashoye kandi amafaranga menshi mu bikorwa remezo, birimo imihanda, ibyambu na gari ya moshi, kugira ngo dufashe abafatanyabikorwa bacu mu bucuruzi kubona inzira zitandukanye zo gutwara ibicuruzwa byabo binyura muri Misiri.” Yakomeje avuga ko ibicuruzwa bishobora kunyuzwa mu muyoboro wa Suez cyangwa bikagera muri uwo muyoboro, hanyuma bigakoresha urusobe rw’ibikorwa remezo by’igihugu kugira ngo bigere ku Nyanja ya Mediterane, bibone uko byoherezwa ku masoko y’u Burayi. Uru rusobe rw’ibikorwa remezo rushingiye ku gace kihariye k’ubukungu ka Suez Canal Economic Zone, kamaze gukurura ishoramari rirenga miliyari 16 z’amadolari ya Amerika. Muri uyu mushinga harimo umuhanda wa gari ya moshi w’amashanyarazi wihuta, ufite agaciro ka miliyari 8.7 z’amadolari ya Amerika, ukazaba ufite uburebure bwa kilometero 2,000 unyura mu bice bitandukanye bya Misiri. Uyu mushinga witwa “Suez Canal on Rails”, bisobanuye Umuyoboro wa Suez ukoresheje gari ya moshi, uzahuza ibyambu byo ku Nyanja Itukura n’ibyambu byo ku Nyanja ya Mediterane, aho ibicuruzwa byoherezwa mu mahanga. Niwuzura kandi ugatangira gukora ku buryo bwuzuye, biteganyijwe ko uzajya utwara toni zigera kuri miliyoni 13 z’ibicuruzwa buri mwaka. Ibi bizatuma ibicuruzwa bishobora kwambutswa igihugu cya Misiri hakoreshejwe gari ya moshi, bityo hirindwe imbogamizi zishobora guterwa n’ihungabana ry’ubwikorezi bwo mu nyanja. Ahmed Rostom yavuze ko Misiri yashoye imbaraga n’amafaranga menshi mu rwego rw’ibikoresho n’ibikorwa bifasha ubwikorezi n’itangwa ry’ibicuruzwa. Yagize ati: “Misiri yemeye gushyira umutungo munini mu ishoramari ryo mu rwego rw’ibikoresho n’ibikorwa bifasha ubwikorezi, inorohereza ubufatanye n’abikorera mu kubaka ibigo by’ubwikorezi n’ububiko bw’ibicuruzwa hirya no hino muri aka gace kanini ka Suez, kugira ngo ibicuruzwa n’ubucuruzi mpuzamahanga bigende neza kandi nta nkomyi.” Ibi bikorwa remezo kandi bigamije gufasha ibihugu bya Afurika kurushaho kwishyira hamwe mu bukungu no mu bucuruzi. Mu rwego rw’Isoko Rusange rya Afurika ry’Ubucuruzi bw’Ibihugu Byose (African Continental Free Trade Area — AfCFTA), izi nzira zo ku butaka zishobora guhuza ibyambu byo muri Afurika y’Amajyaruguru n’inzira z’ubucuruzi zigera muri Afurika y’Iburasirazuba no muri Afurika yo munsi y’Ubutayu bwa Sahara. Binyuze mu gutanga inzira zihuta zo ku butaka zigana ku Nyanja ya Mediterane no ku masoko y’u Burayi, Misiri yizeye ko izahindura ibibazo bishobora guhungabanya urujya n’uruza rw’ibicuruzwa ku isi, ikabibyaza amahirwe yo guteza imbere ubukungu n’ubucuruzi ku mugabane wa Afurika.