Kwamamaza Tesla ku modoka zitwara zonyine byashyizweho amakenga n’iperereza rishya

Iperereza rishya ryashyize hanze impungenge zikomeye ku mutekano n’ubushobozi bwa gahunda ya Full Self-Driving (FSD) ya Tesla, nubwo Umuyobozi Mukuru wayo Elon Musk amaze imyaka avuga ko iri koranabuhanga riri hafi gutuma imodoka zitwara ubwazo neza kurusha abantu. Nk’uko byatangajwe na Reuters, bamwe mu bahoze ari abakozi ba Tesla bakoraga muri iyi  gahunda ya AI bavuga ko FSD igifite ibibazo bikomeye mu mikorere yayo ya buri munsi. Aba bakozi basuzumaga amashusho yafashwe n’imodoka za Tesla bavuga ko babonye imodoka zidahagarara ku modoka zitwara abanyeshuri, kutamenya ibimenyetso by’imodoka

Iperereza rishya ryashyize hanze impungenge zikomeye ku mutekano n’ubushobozi bwa gahunda ya Full Self-Driving (FSD) ya Tesla, nubwo Umuyobozi Mukuru wayo Elon Musk amaze imyaka avuga ko iri koranabuhanga riri hafi gutuma imodoka zitwara ubwazo neza kurusha abantu.

Nk’uko byatangajwe na Reuters, bamwe mu bahoze ari abakozi ba Tesla bakoraga muri iyi  gahunda ya AI bavuga ko FSD igifite ibibazo bikomeye mu mikorere yayo ya buri munsi. Aba bakozi basuzumaga amashusho yafashwe n’imodoka za Tesla bavuga ko babonye imodoka zidahagarara ku modoka zitwara abanyeshuri, kutamenya ibimenyetso by’imodoka z’ubutabazi, kugenda ku muvuduko ukabije ndetse rimwe na rimwe zikaba hafi kugonga abana cyangwa abanyamaguru.

Aba bakozi bazwi nka “data labelers” bavuga ko hari amashusho bagiye babona agaragaza imodoka za Tesla zigonga inyamaswa zirimo imbwa, injangwe n’impongo, rimwe na rimwe zidafashe feri mbere y’impanuka. Bamwe muri bo banavuze ko batakwizera FSD ku rwego rwo kwemera kugenda muri robotaxi ya Tesla.

Iperereza kandi ryagaragaje ko imibare Tesla ikoresha ivuga ko FSD ifite umutekano wikubye inshuro 10 ugereranyije n’umushoferi usanzwe ishobora kuba iyobya. Abashakashatsi mu mutekano wo mu muhanda bavuga ko Tesla yagereranyije impanuka zikomeye zabaye ku modoka zayo n’andi makuru rusange atajyanye n’uburemere bumwe bw’impanuka, ibintu bavuga ko byongera imibare mu buryo budatanga ishusho nyayo.

Byongeye kandi, byavuzwe ko Tesla yakoresheje uburyo bwo gushushanya no kwiga inzira zizakoreshwa mbere yo gutangiza ibikorwa bya robotaxi muri Austin no muri Los Angeles. Ibi bivuguruza ibyo Elon Musk amaze igihe avuga ko Tesla ikoresha gusa camera na AI ku buryo imodoka zayo zashobora gukora ahantu hose ku isi nta gushushanya inzira bibaye ngombwa.

Kwamamaza ubushobozi bwa robotaxi byakomeje kuba imwe mu ntego zikomeye za Tesla, ariko kugeza ubu ibikorwa byayo bikiri mu duce duto kandi bigenzurwa cyane, aho hamwe na hamwe hakiri abagenzuzi b’umutekano bashobora gufata imodoka mu gihe habaye ikibazo.

Mu gihe Waymo yo yemera gukoresha amakarita arambuye ndetse ikanashyira hanze ubushakashatsi bwayo bwemezwa n’inzobere zigenga, Tesla yo ntiratangaza amakuru arambuye ku mpanuka cyangwa uburyo bwuzuye bwo kubara umutekano wa FSD.

Ibi bibaye mu gihe National Highway Traffic Safety Administration ikomeje gukora iperereza ku mpanuka nyinshi zifitanye isano na Autopilot na FSD za Tesla, zirimo izatewe no kutabona neza umuhanda, kutubahiriza amatara yo ku muhanda ndetse no kugonga imodoka z’ubutabazi.