Abantu nibura bane bapfuye, abandi 35 barakomereka nyuma y'inkongi y'umuriro yibasiye sitasiyo itanga amashanyarazi ya Hartha, iherereye mu majyaruguru y'umujyi wa Basra, mu majyepfo ya Iraq.
Iyi mpanuka yabaye mu gitondo cyo ku wa Gatandatu, tariki ya 21 Ugushyingo 2026, ahagana saa kumi n'ebyiri za mu gitondo ku isaha yaho.
Amakuru yatangajwe n'inzego z'umutekano muri Iraq avuga ko umuriro watangiye kuri iyo sitasiyo, ukaza gukwira no mu mazu yari hafi yayo, bituma abaturage benshi bahura n'ingaruka z'iyo mpanuka.
Mu bakomeretse harimo abafashwe n'inkongi ndetse n'abagize ibibazo byo guhumeka kubera umwotsi mwinshi. Abakomeretse bajyanywe mu bitaro kugira ngo bahabwe ubuvuzi.
Minisiteri ishinzwe amashanyarazi muri Iraq yatangaje ko iyi mpanuka yari ifitanye isano n'umuyoboro wa gaz wagaburiraga iyo sitasiyo.
Nyuma y'impanuka, ibikorwa byo gutanga amashanyarazi kuri iyo sitasiyo byahagaritswe mu gihe inzego zishinzwe ubutabazi zakoraga ibikorwa byo kuzimya umuriro. Abashinzwe kuzimya inkongi batangaje ko bashoboye kuwugenzura.
Minisitiri w'Intebe wa Iraq, Ali al-Zaidi, yahise ategeka ko hakorwa iperereza ryihutirwa kugira ngo hamenyekane icyateye iyo mpanuka n'abagomba kubibazwa.
Iyi sitasiyo ya Hartha ifite ubushobozi bwo gutanga amashanyarazi angana na megawati 800, ariko mbere y'impanuka yakoreshwaga itanga megawati zigera kuri 400.
Iraq imaze igihe ihura n'ibibazo mu bijyanye no gutanga amashanyarazi, bitewe n'ibikorwaremezo bishaje, kubura ishoramari rihagije ndetse no kutabungabunga neza ibikoresho bitanga amashanyarazi.
Kugeza ubu, iperereza rirakomeje kugira ngo hamenyekane neza icyateye iyi mpanuka, mu gihe umubare w'abayiguyemo n'abayikomerekeyemo ushobora guhinduka.





Ibitekerezo
Nta bitekerezo biraboneka. Ba uwa mbere utanga igitekerezo.