Guverinoma y’u Rwanda yemeje ingengo y’Imari ya Leta y’umwaka wa 2026/2027 izakoreshwa kuva muri Nyakanga 2026, igera kuri miliyari 7.796,3 Frw. Ni amafaranga yiyongereyeho 12% ugereranyije n’ingengo y’imari ivuguruye y’umwaka wa 2025/2026 yari miliyari 6.952,1 Frw. Muri iyi ngengo y’imari nshya, amafaranga ateganyijwe gukusanywa imbere mu gihugu azagera kuri miliyari 5.273,8 Frw. Ayo arimo miliyari 4.429,1 Frw azava mu misoro, mu gihe miliyari 582,4 Frw azakomoka ku yandi mafaranga atari imisoro. Inkunga z’amahanga ziteganyijwe kuzaba miliyari 548,3 Frw, naho inguzanyo z’amahanga zikazagera

Guverinoma y’u Rwanda yemeje ingengo y’Imari ya Leta y’umwaka wa 2026/2027 izakoreshwa kuva muri Nyakanga 2026, igera kuri miliyari 7.796,3 Frw. Ni amafaranga yiyongereyeho 12% ugereranyije n’ingengo y’imari ivuguruye y’umwaka wa 2025/2026 yari miliyari 6.952,1 Frw. Muri iyi ngengo y’imari nshya, amafaranga ateganyijwe gukusanywa imbere mu gihugu azagera kuri miliyari 5.273,8 Frw. Ayo arimo miliyari 4.429,1 Frw azava mu misoro, mu gihe miliyari 582,4 Frw azakomoka ku yandi mafaranga atari imisoro. Inkunga z’amahanga ziteganyijwe kuzaba miliyari 548,3 Frw, naho inguzanyo z’amahanga zikazagera kuri miliyari 1.974,1 Frw. Amafaranga menshi azakoreshwa mu bikorwa bisanzwe bya Leta no mu mishahara, aho byagenewe miliyari 4.788,5 Frw, mu gihe ibikorwa by’iterambere n’ishoramari rya Leta bizahabwa miliyari 3.010,8 Frw. Ageza ku Badepite n’Abasenateri imiterere y’iyi ngengo y’imari, Minisitiri w’Imari n’Igenamigambi, Yusuf Murangwa, yavuze ko yateguwe hashingiwe ku buryo ubukungu bw’Isi buhagaze, by’umwihariko hitawe ku ngaruka z’intambara zo mu Burasirazuba bwo Hagati ndetse no ku ngamba zo gukomeza gushimangira ubushobozi bw’Igihugu mu kwinjiza umutungo. Yagaragaje ko ubuhinzi bukomeje kuba imwe mu nzego zashyizwe imbere, aho Leta yongereye amafaranga agenewe kunganira abahinzi kugira ngo bakomeze kubona ifumbire ku buryo bworoshye nubwo ibiciro byayo bikomeje kuzamuka ku isoko mpuzamahanga. Mu mwaka ushize, amafaranga yagenewe iyo gahunda yari miliyari 39 Frw, ariko muri uyu mwaka azagera kuri miliyari 64 Frw. Minisitiri Murangwa yavuze ko iri zamuka rigamije kurinda urwego rw’ubuhinzi ingaruka zaterwa n’ibibazo by’umutekano muke bikomeje kugaragara mu Burasirazuba bwo Hagati, bishobora gutuma ibiciro by’ifumbire birushaho kuzamuka. Yashimangiye ko Leta yiyemeje gukomeza gushyigikira abahinzi kugira ngo umusaruro w’ubuhinzi utagabanuka ndetse n’ibiribwa bikomeze kuboneka ku isoko ry’imbere mu gihugu. Uretse ubuhinzi, Guverinoma yanatangaje ko izakomeza gushora imari mu bikorwa bya RwandAir, mu rwego rwo kongera uruhare rwabyo mu iterambere ry’ubukungu no guteza imbere ubwikorezi bw’u Rwanda ku rwego mpuzamahanga. Ingengo y’Imari ya 2026/2027 igaragaza icyerekezo cyo gukomeza gushora imari mu nzego zitanga umusaruro, kongera ubushobozi bw’ubukungu no gukomeza gahunda zifasha imibereho myiza y’abaturage.

Urushijeho kumenya. Urushijeho kwegera abandi.