Ibitero bya Israel muri Gaza byahitanye abantu babiri, abandi barakomereka

Abantu nibura babiri bamaze kwicwa, abandi bane barakomereka mu bitero bya Israel byagabwe mu bice bitandukanye bya Gaza mu masaha 48 ashize, nk’uko Minisiteri y’Ubuzima muri Gaza yabitangaje. Muri Deir el-Balah, mu gice cyo hagati cya Gaza, igitero cya drone cyibasiye umuryango wa Al-Hasanat ku wa Gatandatu, gihitana umuntu umwe ndetse gikomeretsa abandi. Abatabazi n’abakozi ba serivisi z’ubutabazi bihutiye kujyana abakomeretse ku Bitaro bya Al-Aqsa Martyrs. Raporo ivuga ko icyo gitero cyabereye ahantu hari amahema menshi y’abaturage bahunze ingo zabo, ibintu byongera impungenge ku mutekano w

Abantu nibura babiri bamaze kwicwa, abandi bane barakomereka mu bitero bya Israel byagabwe mu bice bitandukanye bya Gaza mu masaha 48 ashize, nk’uko Minisiteri y’Ubuzima muri Gaza yabitangaje.

Muri Deir el-Balah, mu gice cyo hagati cya Gaza, igitero cya drone cyibasiye umuryango wa Al-Hasanat ku wa Gatandatu, gihitana umuntu umwe ndetse gikomeretsa abandi. Abatabazi n’abakozi ba serivisi z’ubutabazi bihutiye kujyana abakomeretse ku Bitaro bya Al-Aqsa Martyrs.

Raporo ivuga ko icyo gitero cyabereye ahantu hari amahema menshi y’abaturage bahunze ingo zabo, ibintu byongera impungenge ku mutekano w’abasivili bakomeje kuba mu byabo.

Israel kandi yakomeje ibikorwa byo gusenya amazu muri Deir el-Balah, aho ibikorwa bibiri byo gusenya inyubako byakozwe, bikurikirwa n’ibisasu byumvikanye mu bice bitandukanye by’umujyi.

Mu Khan Younis, mu majyepfo ya Gaza, ibisasu bya Israel nabyo byibasiye ibice bitandukanye birimo aho abaturage bavuye mu byabo bari barashyiriwe amahema. Ibitero byakomereje no mu bice bya Nuseirat na Bureij.

Raporo kandi ivuga ko ingabo za Israel zakomeje kwagura ibikorwa byazo mu burasirazuba bwa Gaza City, ndetse zigakomeza gusenya ibikorwa remezo n’inyubako ziri mu gace kazwi nka “Yellow Line.”

Abaturage benshi bakomeje kuba mu kaga

Minisiteri y’Ubuzima muri Gaza ivuga ko abantu benshi bishwe mu bitero byabanje bagikomeje kuba munsi y’ibisigazwa by’inyubako zasenywe, kubera ko abatabazi batabasha kubageraho.

Kuva mu Kwakira 2025, ubwo habayeho amasezerano yo guhagarika imirwano, Minisiteri y’Ubuzima ivuga ko Abanya-Palestine 1,285 bamaze kwicwa mu bitero bya Israel.

Muri rusange, kuva intambara yatangira mu Kwakira 2023, iyo Minisiteri ivuga ko Abanya-Palestine 73,419 bamaze kwicwa muri Gaza, benshi muri bo bakaba ari abagore n’abana.

Nubwo iyi mibare itarimo abantu bose, abayobozi bavuga ko ibihumbi by’abantu bikekwa ko bikiri munsi y’ibisigazwa by’inyubako zasenywe.

Mu gihe imiryango ikomeje gushakisha imibiri y’ababo no kuyishyingura, ibibazo by’ubutabazi muri Gaza birushaho gukomera, cyane cyane ikibazo cy’aho gushyingura abapfuye n’umutekano w’abaturage bakomeje kwimurwa.