Huye: Abagabo batatu bakatiwe igifungo nyuma yo guhamwa n'icyaha cyo kwica.

Urukiko Rwisumbuye rwa Huye rwakatiye igifungo cya burundu abagabo batatu bahamijwe kwica Mukeshimana Claudine, mu cyaha cyabereye mu Kagari ka Cyotamakara, Umurenge wa Ntyazo mu Karere ka Nyanza. Abakatiwe ni Nyamurinda Théophile w’imyaka 44, umugabo wa nyakwigendera, Ntawupfabimaze Athanase uzwi nka Kazungu w’imyaka 28, na Ndagijimana Vincent uzwi nka Mayombora w’imyaka 76 y'amavuko. Ubushinjacyaha bwavuze ko Nyamurinda yaba yarateguye umugambi wo kwica umugore we nyuma yo gushaka undi mugore, bakanabyarana. Ku wa 30 Ukuboza 2023, abo bagabo batatu ngo bageze mu rugo rwa Mukeshimana nijoro,

Urukiko Rwisumbuye rwa Huye rwakatiye igifungo cya burundu abagabo batatu bahamijwe kwica Mukeshimana Claudine, mu cyaha cyabereye mu Kagari ka Cyotamakara, Umurenge wa Ntyazo mu Karere ka Nyanza. Abakatiwe ni Nyamurinda Théophile w’imyaka 44, umugabo wa nyakwigendera, Ntawupfabimaze Athanase uzwi nka Kazungu w’imyaka 28, na Ndagijimana Vincent uzwi nka Mayombora w’imyaka 76 y'amavuko. Ubushinjacyaha bwavuze ko Nyamurinda yaba yarateguye umugambi wo kwica umugore we nyuma yo gushaka undi mugore, bakanabyarana. Ku wa 30 Ukuboza 2023, abo bagabo batatu ngo bageze mu rugo rwa Mukeshimana nijoro, maze Nyamurinda amupfukisha igitenge ku mazuru no ku munwa, Ntawupfabimaze akamufata amaguru, mu gihe Ndagijimana yari afite itoroshi abamurikira. Umurambo we waje gusuzumwa, hagaragazwa ko yishwe anizwe. Icyatumye aba bagabo batabwa muri yombi nyuma y’imyaka isaga ibiri ni uko ku wa 6 Kamena 2026, Ntawupfabimaze yagiye ku mukuru w’Umudugudu kwishyuza FRW Nyamurinda yari akimubereyemo. Yavuze ko yari yarasezeranyijwe 150.000 Frw kubera uruhare mu kwica Mukeshimana, ariko akaba yari amaze guhabwa 50.000 Frw gusa. Mu gihe abaturage bari bateranye kugira ngo ikibazo gikemurwe, yabasobanuriye iby’ubu bwicanyi, bituma inzego z’umutekano zitangira iperereza. Mu rukiko, Ntawupfabimaze yemeye uruhare rwe asaba kugabanyirizwa igihano, mu gihe Nyamurinda na Ndagijimana bahakanye icyaha. Urukiko rwashingiye ku buhamya n’ibindi bimenyetso, birimo ibyavuye mu isuzuma ry’umurambo, rutegeka ko bose uko ari batatu bafungwa burundu. Icyakora, abaregwa bajuririye icyo cyemezo mu Rukiko Rukuru, Urugereko rwa Nyanza, kugeza ubu bafungiye mu Igororero rya Huye.     Umwanditsi: Marie Florence NDAYISHIMIYE