Haaland yacishije bugufi Brazil, Norway ikomeza kwandika amateka mu Gikombe cy’Isi

Ikipe y’Igihugu ya Norway yanditse amateka isezerera Brazil, imwe mu makipe yibigwi  mu mupira w’amaguru ku Isi, iyitsinze ibitego 2-1 mu mukino wa 1/8 cy’Igikombe cy’Isi cya 2026, biyihesha itike ya 1/4. Uyu mukino wabaye mu ijoro ryo ku wa 5 Nyakanga 2026, waranzwe n’imbaraga z’impande zombi ndetse n’ubwitange budasanzwe bwa rutahizamu wa Norway, Erling Haaland, watsinze ibitego byombi byahesheje igihugu cye intsinzi. Norway yatangiye umukino yerekana ko yifuza gutsinda, ndetse Patrick Berg yari yabanje kunyeganyeza inshundura ku mupira wari uvuye kuri Alexander Sørloth, ariko igitego cyan

Ikipe y’Igihugu ya Norway yanditse amateka isezerera Brazil, imwe mu makipe yibigwi  mu mupira w’amaguru ku Isi, iyitsinze ibitego 2-1 mu mukino wa 1/8 cy’Igikombe cy’Isi cya 2026, biyihesha itike ya 1/4. Uyu mukino wabaye mu ijoro ryo ku wa 5 Nyakanga 2026, waranzwe n’imbaraga z’impande zombi ndetse n’ubwitange budasanzwe bwa rutahizamu wa Norway, Erling Haaland, watsinze ibitego byombi byahesheje igihugu cye intsinzi. Norway yatangiye umukino yerekana ko yifuza gutsinda, ndetse Patrick Berg yari yabanje kunyeganyeza inshundura ku mupira wari uvuye kuri Alexander Sørloth, ariko igitego cyangwa nyuma yo gusuzumwa n’ikoranabuhanga rya VAR basanga Sørloth yaraririye. Brazil yahise ibona uburyo bwiza bwo gufungura amazamu nyuma y’aho Matheus Cunha agushijwe mu rubuga rw’amahina na Kristoffer Ajer. Umusifuzi Ismail Elfath yatanze penaliti nyuma yo kureba amashusho, ariko Bruno Guimarães ayitera nabi maze umunyezamu Ørjan Nyland ayikuramo. Nyland yakomeje kubera ibamba ba rutahizamu ba Brazil, akuramo amashoti akomeye ya Gabriel Martinelli na Vinícius Júnior, bituma amakipe yombi ajya kuruhuka anganya ubusa ku busa. Mu gice cya kabiri, umutoza wa Brazil Carlo Ancelotti yinjije Endrick kugira ngo yongere imbaraga mu busatirizi, ndetse yabonye uburyo bukomeye ariko ishoti rye ricamo ku ruhande. Norway yakomeje gukina ituje, maze ku munota wa 79 Erling Haaland atsindisha umutwe umupira mwiza yari ahawe na Andreas Schjelderup, atsinda igitego cya mbere nyuma yo kurusha imbaraga myugariro Gabriel Magalhães. Brazil yashatse kwishyura, ariko Nyland akomeza kwitwara neza, akuramo imipira ikomeye ndetse anafashwa n'ipoto ku mupira wari ugiye kwinjira mu izamu. Ku munota wa 90, Haaland yongeye kwigaragaza atsinda igitego cya kabiri cyiza cyane nyuma yo kwakira umupira wa Schjelderup, awutera n’akaguru k’ibumoso awushyira kure y’umunyezamu Alisson Becker. Brazil yabonye penaliti mu minota y’inyongera nyuma y’aho Leo Østigård akubise inkokora Casemiro mu rubuga rw’amahina. Neymar ni we wayiteye ayinjiza, ariko byabaye ihumure rito kuko umukino wahise urangira Norway itsinze ibitego 2-1. Iyi ntsinzi yahesheje Norway kugera muri 1/4 cy’Igikombe cy’Isi, aho izahura n’izava hagati y’u Bwongereza na Mexique.

Haaland yakomeje kwandika amateka

Erling Haaland yongeye kwerekana urwego rudasanzwe ariho. Yagejeje ibitego birindwi mu mikino y’Igikombe cy’Isi, anganya na Lionel Messi ndetse na Kylian Mbappé, anaba umwe mu bakinnyi bakomeje guhatana ku gikombe cy’umukinnyi watsinze ibitego byinshi muri iri rushanwa. Uyu rutahizamu wa Manchester City kandi amaze gutsinda mu mikino 14 yikurikiranya akinira Norway mu marushanwa, aho muri iyo mikino yose amaze gutsindamo ibitego 27. Ku ruhande rwa Brazil, guhusha penaliti kwa Bruno Guimarães byagize uruhare rukomeye muri uku gutsindwa. Ni ubwa mbere ananiwe kwinjiza penaliti akinira Brazil, ndetse ni ubwa mbere umukinnyi w’iki gihugu ahushije penaliti mu mukino w’Igikombe cy’Isi kuva Zico yabikora mu 1986. Brazil yongeye gusezererwa n’ikipe yo ku Mugabane w’u Burayi mu mikino ya kamarampaka y’Igikombe cy’Isi, ikomeza umusaruro mubi umaze imyaka irenga makumyabiri, mu gihe Norway ikomeje urugendo rw’amateka mu Gikombe cy’Isi cya 2026.