Perezida wa Leta Zunze Ubumwe za Amerika, Donald Trump, yatangaje ko Urwego rw'Ubugenzacyaha rwa Amerika (FBI) ruri gukora iperereza ku muyobozi mukuru w'ikigo cy'ikoranabuhanga cya Nvidia, Jensen Huang, nyuma y'amakuru avuga ko yaba yaragiranye umubano wihariye n'umugore ukekwaho gukorera inzego z'ubutasi z'u Bushinwa.

Nk'uko Reuters yabitangaje ku wa 9 Ugushyingo 2026, Trump yavuze ko ku wa Mbere yavuganye na Jensen Huang, amubaza niba yari azi ko uwo mugore akekwaho kuba intasi y'u Bushinwa.

Trump yavuze ko Huang yamusubije ko atari azi ko uwo mugore akekwaho ubutasi, ndetse agaragaza ko yemera ibisobanuro yahawe n'uwo muyobozi.

Uyu mugore witwa Alice Huang, wahoze ari umuyobozi muri kompanyi y'ikoranabuhanga ya Megaspeed ikorera muri Singapore, akekwaho kuba yarakoraga ibikorwa byo kugeza amakuru ku nzego z'ubutasi z'u Bushinwa.

Icyakora, ibi biracyari ibirego biri gukorwaho iperereza, kandi u Bushinwa bwahakanye ibyo bushinjwa, buvuga ko ari ibirego bidafite ishingiro.

Ku rundi ruhande, ubuyobozi bwa Nvidia bwatangaje ko bwatangiye iperereza ryigenga rigamije kumenya niba Jensen Huang yaba yarabaye igikoresho cy'ibikorwa by'ubutasi bw'amahanga. Icyo kigo kandi cyavuze ko kugeza ubu nta kimenyetso gifatika gifite cyerekana ko amakuru yacyo y'ibanga cyangwa umutekano w'igihugu byaba byarahungabanyijwe.

Iyi nkuru yatumye imigabane ya Nvidia igabanukaho hafi 4.27% ku isoko ry'imari ku wa Mbere, bihwanye no gutakaza agaciro kagera kuri miliyari 200 z'amadolari ya Amerika.

Jensen Huang ni umwe mu bantu bakomeye mu nganda zikora utwuma duto tw'ikoranabuhanga tuzwi nka computer chips, by'umwihariko ibikoreshwa mu guteza imbere ubwenge buhangano (AI).

Iri perereza rikomeje gukurikiranwa cyane kubera ko Nvidia ari ikigo gikomeye mu ikoranabuhanga ku isi, kandi umubano wa Amerika n'u Bushinwa ukomeje kurangwa n'ipiganwa rikomeye mu bijyanye n'ikoranabuhanga n'ubwenge buhangano.

Urushijeho kumenya. Urushijeho kwegera abandi.