Nyuma yo kunganya na Amavubi mu mukino warangiye ari 0-0 ku wa Kabiri, Augustine Eguavoen, wari umutoza w’agateganyo wa Super Eagles, yasezeye ku mwanya we. Eguavoen, usanzwe ari umuyobozi ushinzwe tekiniki muri Federasiyo y’Umupira w’Amaguru ya Nigeria (NFF), yabitangaje mu kiganiro yagiranye n’itangazamakuru, ashimangira ko inshingano yari yahawe n’abakoresha be zarangiranye n’uyu mukino.
“Inshingano zanjye zari ugutoza imikino ibiri, none zarangiye uyu munsi. Ndashimira abakinnyi banjye ndetse n’ubuyobozi bwa NFF,” Eguavoen yagize ati.
Uyu mutoza w’imyaka 58, wari waratoje Super Eagles inshuro eshatu zashize, yongeye guhabwa izi nshingano nyuma y’uko byari byananiranye kubona umutoza mukuru uhoraho. Muri iyi mikino ibiri y’Amatsinda yo gushaka itike y’Igikombe cya Afurika cya 2025, Eguavoen yatoje ikipe ya Nigeria itsinda Benin 3-0 ku wa Gatandatu i Uyo, mu gihe ku wa Kabiri banganyaga na Rwanda 0-0, bituma Nigeria ibona amanota ane mu mikino ibiri.
N’ubwo NFF itaratanga itangazo ku by’iyi nkuru, biravugwa ko Eguavoen agiye gusubira ku mirimo ye nk’umuyobozi ushinzwe tekiniki muri Federasiyo, mu gihe hashakishwa umutoza mukuru uzatoza Super Eagles.